SAJAK SUNDA DINA PASANGGIRI SENI SUNDA TINGKAT KABUPATEN BANDUNG 2017

Setiap tahun selalu diadakan lomba atau Pasanggiri yang berkaitan dengan budaya Sunda, diantaranya adalah Pupuh Sunda, Dongeng Sunda, maupun Sajak Sunda. Setiap jenjang pendidikan mulai dari SD, SMP, hingga SMU/SMK memiliki kriterianya masing-masing. Berikut adalah Sajak Sunda yang menjadi materi pasanggiri sajak Sunda tingkat SD tahun ajaran 2017/2018 untuk tingkat Kabupaten Bandung. Semoga bermanfaat.

(WAJIB)

UKUR DINA PANINEUNGAN

ACAH .T

Gunung nu ngalamuk paul

Kiwari turundul gundul

Kakayon tumuwuh subur

Kari tunggul nu parentul

Dituaran digadabah

Ku jelema nu sarakah

Sora budak cikcikbung

Teu kakuping sirna suwung

Di cai walungan kiruh

Kokotor geus teu paruguh

Campur limbah pabrik pinuh

Panas taya iuh-iuh

Gelik suling teu kakuping

Budak angon teu ngahariring

Ganti sora lagu barat

Matak pegat urat sarap

Da lagu Sunda teu wawuh

Budaya anyar tumuwuh

Sora kai reujeung mideur anu baku

Keur patani geus ngabaju

Jeung wuluku geus teu laku

Ganti ku guruh traktor

Buatan Jepang nu sohor

Sangkan magawe teu kendor

Alam endah meh geus punah

Wanci nu asri lastari

Nu aya kantun waasna

Ukur dina panineungan

TUKEURAN IEU SAJAK

YUS RUSYANA

Tukeuran ieu sajak
kusalambar simbut atawa samak saheulay
heug rungkupkeun ka barudak anu teu kaburu heuay
patinggolépak dina trotoar
Tukeuran ieu sajak
ku béas wuluh atawa heucak
heug sidkahkeun ka nu haropak
anu marangkuk di saung atawa di kolong sasak
Tukeuran ieu sajak
ku sababaraha siki pélor
heug témbakkeun kana genggerong koruptor manipulator
sina enya kalojor
Tukeuran ieu sajak
ku beubeutian tina kalbu anu rido
keur nyebor anu balangsak
(Lamun teu kitu sasaak)

SEUNEU BANDUNG

KARNA YUDIBRATA

Saha nu bisa mareuman seuneu Bandung

Geni sakti nu nyebrot ti dapur Cikapundung

Najan laut Kidul

Ngolétrak dipaké nyiram?

Seuneu Bandung

Dayang Sumbi gupay pucukna

Tangkuban Parahu jadi suluhna;

Sut urang sundut 

Nyeungeut obor kamerdékaan

Bray caang lampu néon jutaan watt.

Langit ngempray; langit harepan

Seuneu teuneung geni kawani

Ngaléntab sagara keusik

Ngahuru, ngabela-bela

Ngaduruk leuweung-ganggong langit-ganggong

Asia-Afrika bébas merdéka!

Seuneu nyebrot ti dapur Cikapundung

Geni sakti, cahya ilahi

Hamo bisa dipareuman

WAAS

R. EVA ZAENAL

Aya asri tanah kuring

Endah diamparan sawah

Parena sumedeng beukah

Diriung pakebonan

Paragpag ku palawija

Cur-cor caina ngagenclang

Ngalocor di tiap pancuran

Duh tanah Priangan

Aya waas neuteup anjeun

Muga kaendahan anjeun

Langgeng sapanjangna

Suku langit tanah priangan

Dipager gunung-gunung pulas paul

Ngajega mapakan mega

Ngajegir jauh kagimir

Diaping pasir-pasir

Liuh linduk tutuwuhan

Hejo lembok dangdaunan

SISI BALONG NGAGOLĔTAK

YUS RUSYANA

Umurna sawelas taun kira-kira
Na tonggongna buntelan ku samping beureum
Kopĕahna buludru belel henteu coplok
Kawas tibra sisi balong ngagoletak

Irungna, biwirna, ramo-ramona jeung dampal sukuna
Geulang karet dina pigeulangan leungeun kenca
Na sukuna aya patlot solobong awi
Deukeut kuciat bukuna pabalatak

Umurna sawelas taun kira-kira
Awakna sehat parangi marahmay
Ngan lebah igana deudeuh
Bajuna rangsak

Taya anu nangenan kahalang daun taleus
Kawas ngimpi sisi balong, deudeuh
Bukuna dibungkusan ku keretas endog beureum
Tanah air kita, kapunyaan Tata kelas lima A

Umurna sawelas taun kira-kira
Kawas tibra sisi balong ngagoletak
Teu kadenge manuk sapu noroweco na regang tangkal harendong
Deukeut kuciat, deudeuh
Buku-bukuna pabalatak